LAOAG CITY – Inadmitir ni Mr. Salvador Caroy a taga siudad ti Batac nga adu pay laeng a pannubok ti mapasaran sakbay a magun-od ti naan-anay a panagballigi iti negosio.
Segun kenkuana, saan a kaskarina a nakaipatakder ti bukudna a negosio gapu ta adu a rigat, anus ken sakripisio ti inpaayna tapno agballigi daytoy.
Inbatadna a ti damo a panaglakona ti air conditioner ket narigat nangruna ket awan pay idi ti napintas ken nasayaat a puestona no sadinno a naipatakder laeng iti garahe ti pagtaenganda.
Nupay kasta, inlawlawagna a babaen ti tulong ti kabsatna nga isu ti nangisuro ken nangbayabay kenkuana iti panangmanihir ti negosio ket in-inotna daytoy a nasursuro.
Kunana a ti maysa kadagiti kadakkelan a pannubok a napasaranna ket idi pandemia no sadinno nga inpagarupna a saanen a mabiag ti negosiona ngem babaen iti tulong ti kabsatna ken ti pamiliana ket nagtultuloy daytoy.
Mainaig iti daytoy, inpakaammona nga idi tawen 2018 idi nangrugi a serrekenna ti negosio ken saanna nga inlibak nga idi rugrugina ket pudno a narigat.
Naammoan a registered nurse ni Mr. Caroy a nagtrabaho iti Mariano Marcos Memorial Hospital and Medical Center iti uneg ti uppat a tawen ken nagtrabaho pay idiay Saudi Arabia iti las-ud met ti tallo a tawen.
Kabayatanna, adda metten ti pito a tawen nga agop-operar ti negosiona.
