LAOAG CITY – Inpakaammo ni Dr. Hector Baytec, iti Vancouver, Canada nga adu a Pilipino dagiti madandanagan gapu ti panagwaras ti coronavirus pandemic iti Canada.
Kuna na a kaaduan kadagiti Pilipino ket awanen iti pagtrabahuan da kalpasan a nagsardeng da gapu ti coronavirus.
Adda met dagiti agtultuloy nga agtrabtrabaho bayat nga adda iti uneg ti pagtaengan.
Segun kenni Baytec, adda met ti tulong ti gobyerno kadagiti naapektaran a Canadian agraman dagiti Pilipino.
Inbatad na nga awan ti lodckdown iti lugar da ngem nabalakadan da a liklikan dagiti natatao a lugar.
Naiget a tungtungpalen dagiti tattao ti social distancing tapno maliklikan ti panagwaras ti coronavirus.
Inlawlawag na a maipatpatungpal ti social distancing kadagiti groserya ken dadduma pay.
Kuna ni Baytec nga umabot iti 6 a kadapan ti nasken a kaadayo iti tunggal a indibidwal.
Saan met nga agkurang ti suplay kadagiti merkado kangrunaan dagiti makmakan idinto a naibusa dagiti lako a toilet paper.
Mainaig iti daytoy, inpakaammo ni Baytec nga inbalakad ti gobyerno ti Canada ti saanen a panagturong dagiti tattao kadagiti pampubliko a lugar kas iti parke, ken adda pay ti plano a mairekep dagiti playgrounds.
Kabayatanna, Umabot ti nasurok 15 a ribo ti bilang ti kaso ti CoVID-19, nasurok 230 dagiti pimmusay ken 2,590 dagiti naimbag manipud iti nasao a virus.
Inbatad na nga arig a sentro ti virus iti Quebec ken iti Ontario gapu ta kaasideg laeng ti estado ti New York a kaaduan iti kaso ti COVID-19 iti intero nga Estados Unidos.
Innayon ni Baytec nga awan met dagiti ammo na a Pilipino a naapektaran ti coronavirus.
