LAOAG CITY – Dakkel ti pammati ti Philippine National Police a ti affidavit ni whistleblower Julie Patidongan alyas “Totoy” ken dagiti kabsatna ket mausar a mangpatibker iti kaso kontra iti akin-utek kadagiti mapukpukaw a mammallot.
Segun ken ni Philippine National Police spokesperson PBGen. Jean Fajardo, da Elakim ken Jose a kabsat ni Patidongan ket naipasubli ditoy Pilipinas idi Hulio 22 kalpasan a natiliw dagitoy iti saanen a naibuksilan pay a pagilian iti Asya.
Ni Elakim ti maitudtudo a nagusar ti ATM card ti biktima a ni Melbert John Santos idinto a ni Jose ket nakita iti video a naka-escort iti biktima a ni Michael Bautista a nakaposas iti Sta. Cruz idi Abril 28, 2021.
Namnamaen ti Philippine National Police a ti dua ket agsarita no ania ti pakainaiganda kadagiti mapukpukaw a mammallot ken mangibaga no asino ti nangibilin kadakuada nga aramidenda daytoy.
Inpetteng ni Fajardo a ti manamnama nga ibutaktak ti dua ket mangsuportar iti statement ni Julie nga isuna ket saan nga agmaymaysa idi papatayen dagiti mapukpukaw a mammallot ken asino ti mastermind ti krimen.
Immunan nga intudo ni Julie ti negosiante a ni Charlie “Atong” Ang, aktres a ni Gretchen Barreto ken 15 a police officers a karaman iti nasao a kaso.
