LAOAG CITY – Ad-adda pay a napaigetan ti koordinasyon ti Philippine National Police (PNP) ken Armed Forces of the Philippines (AFP) ita a semana santa uray awan ti mamonmonitor da nga aniaman a pangta manipod kadagiti terorista a grupo.
Daytoy ti inbatad ni Major Erikson Bolusan, ti pannakangiwat iti AFP-Northern Luzon Command.
Inpasingked na nga ar-aramiden da amin tapno masigurado ti seguridad dagiti tattao iti nagduduma a lugar ditoy pagilyan, karaman ditoy dagiti maibilang a tourist destinations ditoy Pilipinas.
Kabayatanna, inbatad ni Bolusan a saan a maliklikan nga adda dagiti kameng ti New People’s Army (NPA) a possible a manggundaway nga agawid kadagiti bukod da a pamilya ita a semana santa.
Mangnamnama ni Bolusan a makapanunot metten dagiti rebelde a grupo ken mangabarwanan da gapu ta saanda nga ibilang a kabusor ti grupo no ket mamati da a biktima laeng dagitoy iti saan a maiparbeng a pammati.
