LAOAG CITY – Nakasagana ken nakadeploy dagiti kameng ti Armed Forces of the Philippines iti probinsya ti Isabela gapo iti Bagyo Paolo.
Iti eksklusibo a pannakinnuman ti Bombo Radyo kenni Lt. Col. Ericson Bulosan, Commander ti 95th Infantry Battalion a nakabase iti San Mariano, Isabela, sumagmamano a grupo ti nabukel nga isu ti agbalin a search and rescue ti nakadeploy iti nagduduma a lugar iti probinsya.
Segun kenni Bulosan, adda ti abiso ti Disaster Risk Reduction and Management Office para iti pre-emptive evacuation nangruna kadagiti coastal areas kas iti Dinapigue, Palanan, Maconacon ken Divilacan.
Inbatad na nga adda dagiti sumagmamano a residente a napan iti nangatngato ken natalged a lugar.
Naamoan nga adda payen ti panagpukaw ti serbisyo ti kuryente kadagiti nagduduma a paset ti Isabela ken isuda nga armada ket agus-usar da ti generator iti panagmonitor.
Agpapan maisursurat ti damag ket makarikrina ti probinsya ti Isabela ti napigsa nga angin gapo iti bagyo.
