LAOAG CITY – Umabot iti 30 a kameng ti grupo nga Akbayan ti nangiwayat ti tignay protesta idiay Honolulu, Hawaii gapu iti naiget a panangkontra da ti panangipaay ni Presidente Rodrigo Duterte ti pardon kenni Lance Cpl. Joseph Scott Pemberton.
Iti report ni Bombo International Correspondent Manny Pascua iti Hawaii, inbaga na nga addan ni Pemberton idiay Hawaii ken maibalud daytoy iti Camp H. M. Smith a Marine Corps. Installation nga adda iti babaen ti Pacific Command.
Agtalinaed ni Pemberton iti Camp H. M. Smith agingga a saan a madesisyon no rumbeng nga agtalinaed iti US military wenno saan kalpasan a nakunviktaran iti kaso a pammapatay gapu iti panangpatay na iti transgender a ni Jennifer Laude.
Mainaig iti daytoy, adda ti alegasyon idiay Amerika a maipagarop nga inmaro ti gobierno ti Pilipinas ni Pemberton tapno ad-ado a tulong ti maala na manipod iti Estados Unidos partikular iti benneg ti militar.
