LAOAG CITY – Umabot ti 30 nga estudyante dagiti nasaniban iti Marcos National High School iti ili a Marcos.
Iti interview ti Bombo Radyo Laoag ni Mr. Paciano Cid, principal iti nasao a pagadalan, inbatad na a possible a kinagura dagiti dakes nga espiritu ti pannakaikkat ti balay da nga isu ti nakaipatakderan ti baro a building iti nasao a pagadalan.
Inbatad na a kabayatan ti pannakasanib dagiti estudyante da ken inyik-ikkis da a naperdi ti pagyanan da, isubli da dagiti napukan a kayo ken saanda a kayat ti baro a building iti nasao a pagadalan.
Inpukpukkaw pay dagiti dadduma nga estudyante ti ‘patayen kayo amin’.
Gapu ti daytoy, kuna ni Cid a mangiyuswat da ti ritual kas ti kayat a mapasamak dagiti dakes nga espiritu, sukatan da dagiti napukan a kayo ngem saanna a maibaga no tungpalen da ti kayat dagiti maseknan a mapukaw ti baro a building da.
Inpakaammo ni Cid nga aramiden da ti kayat a ritual dagiti dakes nga espiritu tapno saanen a maulit ti napasamak, ngem saanda a mabalin a rakraken ti baro a building.
Innayon na a kasarita danto dagiti dakes nga espiritu tapno agtalinaed ti baro a building iti nasao a pagadalan.
Inpakaammo ni Cid a masuspenso pay laeng agingga intono biernes ti klase iti nasao a pagadalan kalpasan ti pannakasanib dagiti agarop 30 nga estudyante da.
Daytoy ket gapu ta mangisayangkat da pay laeng ti ritual a kalikagom dagiti dakes nga espiritu.
Segun ken ni Cid, tumulong ni mayor Tony Mariano iti aniaman nga addang da tapno saanen a maulit ti pannakasanib dagiti agarop 30 nga estudyante da.
Immuna ti daytoy, inbatad ni Cid nga immuna a naitaray dagiti nasaniban nga estudyante da iti Rural Health Unit (RHU) ngem inyakar da iti simbaan katolika nga isu ti nakairaragan da.
Kabayatanna, inbalakad ni Cid kadagiti estudyante a masapol nga agtalek iti namarsua tapno narigrigat da a maallukoy dagiti dakes nga espiritu.
Kuna na pay a masapol a sakbay a mapan da iti pagadalan ket mamigat da idinto nga inbalakad na met kadagiti nagannak a rumbeng a kanayun da a palagipan dagiti annak da a limitaran da ti agusar kadagiti gadgets ken liklikan ti agpuyat.
