LAOAG CITY – Agtultuloy ti maiyus-uswat a culling operation wenno pannakapapatay dagiti baboy nga adda iti uneg ti 500-meter radius kalpasan a nakastreken iti Barangay Elizabeth iti ili ti Marcos ti African Swine Fever (ASF).
Segun kenni Police Lt. Rudy Jacalne, ti chief of police ti PNP-Marcos, karaman iti maisakripisyo a mapapatay ket 17 manipud iti Barangay Elizabeth ken 22 a baboy manipud iti Baranagy Cacafean nga adda iti uneg ti 500-meter radius.
Inlawlawag na a kinasarita ti Dept. Of Agriculture pakairamaman ni Dr. Loida Valenzuela, ti provincial veterinarian dagiti agtartaraken ti baboy a masapol a mapapatay dagiti taraken da.
Inbatad na nga adda latta dagiti nakagura ken nakasangit nga agtartaraken ngem kunana a maawatan da daytoy ken gagangay nga adda ti pannakaluksaw dagiti maseknan.
Nupay kasta inpasigurado met ti LGU-Marcos a dagiti apektado ket isun to ti maiprayoridad a maikkan ti ayuda para iti pannakapabaron to ti panagtaraken da ti baboy.
Immapela met ni Jacalne a makikooperar dagiti agtartaraken ti baboy a maapektaran tapno dagus a malapdan ti ad-adda pay a panagwaras ti ASF.
Kabayatanna, kuna ni Dr. Valenzuela a karaman kadagiti imbestigaren da ket no naggapoan ti baboy a naparti iti barangay Elizabeth.
Daytoy ket kalpasan nga adda ti naiyawid a karne ti baboy iti pagtaengan ti napan nagparti nga indibidual no sadinno a ti mismo taraken na a baboy ket pimmusay.
