LAOAG CITY – Inbatad ti Commission on Elections (Comelec) a manamnama nga umabot iti agarop 500 a ribo a botante ti maikkat iti Automated Fingerprint Identification System ti ahensya.
Daytoy ket gapu ta naduktalan a dagiti maseknan ket double ken multiple registrants.
Segun ken ni Commission on Election chairman George Garcia, dagiti double ken multiple entries ket nairehistro manipod Hulyo 15 agingga iti Setyembre 30 ita a tawen nga isu met ti deadline ti voter registration para iti 2025 midterm elections.
Inpakaammo ni Garcia a mangiyuswat ti election registration boards ti special meeting sakbay nga ipinal da ti listaan ita metlaeng a bolan.
Innayon na nga amwen nga umuna ti poll body ti rason para iti double wenno multiple registrations.
Mainaig iti daytoy, nagballaag ni Garcia a ti panagrehistro ti nasursurok ngem maysa ket maibilang kas election offense.
Inpetteng na a ti siasinno man a mapaneknekan a nagrehistro iti namindua a daras ket mabalin a makasoan ti election offens a mabalin a pakaibaludan ti maysa agingga iti innem a tawen.
