LAOAG CITY – Naiget ti panagsagana dagiti atleta iti Ilocos Norte para iti Region 1 Athletic Association Meet a maiyuswat intono Mayo 14-19 idiay San Carlos City, Pangasinan.
Segun kenni Mr. Gene Reginaldo, ti Sports Officer iti Schools Division Office, nasurok kumurang a 600 nga atleta ti manarimaan a dumaldalan iti intensive training a nangrugi idi Abril 10 ken agpatingga intono Mayo 11.
Kunana a gapo iti kabara ti panawen, ipatpatungpal da ti window hour wenno mairugi ti panagsanay iti 6:30 iti bigat agingga iti alas-diyes ken maituloy ti alas-kwatro.
Mangrugi met iti alas-diyes iti bigat agingga iti 11:30 ken ala-una agingga iti 3:30 ti malem ket isu ti idadalan met iti catch up lesson dagiti atleta.
Inlawlawag na nga adda met ti schedule dagiti school nurse a mangmonitor kadagiti atleta tapno masigurado a nasalun-at dagitoy.
Inbatad met ni Eric Aguilar, ti Division Sports Coordinator ti probinsya a positibo met amin ti feedback dagiti coaches dagiti atleta ken uray dagiti national trainers.
Patien na a gapo iti daytoy ket dakkel ti namnama da a makaala kadagiti ado a medalya iti nasao a paay-ayam.
Kabayatanna, ti laeng boxing ti saan a pakilabanan ti Ilocos Norte gapo iti amak a mairisgo ti atleta.
