LAOAG CITY – Umabot iti sumurok-kumurang 100 a tobacco farmers iti ili ti Pinili ti nakaawat kadagiti kagamitan a mausar iti panangipasdek kadagiti pugonda.
Segun ken ni Mayor Rommel Labasan, dagiti drums ken liso wenno galba ket isu ti maysa kadagiti inpaayda kadagiti tobacco farmers iti nasao nga ili.
Inbatadna a dakkel a tulong daytoy kadagiti tobacco farmers tapno in-inot a makapatakderda kadagiti pugonda a paglutoan kadagiti maapitdanto a tabako.
Kunana a saan nga agbabain a mangipadanon kadagiti arungaing wenno problemada gapu ta silulukat ti opisinana a pagkiddawan ti tulong.
Malaksid iti daytoy, inpalagipna kadakuada nga agpalista no adda dagiti programa wenno maawatda a kapada a tulong tapno awan ti agbalin a problema ken agriri.
Innayonna a pakpakauna pay laeng dagitoy para kadagiti mannalon iti ili ti Pinili gapu ta adu pay dagiti sumarsaruno a maipaay kadakuada.
Maipalagip nga iti ili ti Pinili ket isu ti kaadoan kadagiti mannalon nga agmulmula ti tabako ditoy probinsia.
