LAOAG CITY – Dumanon iti 200 a baboy ti naikali iti Brgy. Mariquet ili ti Solsona kalpasan a nagpositibo iti African Swine Fever wenno ASF virus.
Daytoy ti inpakaammo ni Vice Mayor Jonathan De Lara, Acting Local Chief Executive iti nasao nga ili.
Segun kenkuana, adda ti agarup 80 nga agtartaraken ti baboy ti naapektaran ti culling process.
Inbatadna a basar iti naiyataday iti programa iti Department of Agriculture, mabayadan dagiti maikali a baboy kas ti burias nga addan ti 30 nga aldaw ken agpangato ti makaawat ti uppat a ribu a pisos.
Kunana a makaawat dagiti naapektaran ti baboyna nga agdagsen ti 70 a kilo agingga iti 80 a kilo ti walo a ribu a pisos.
Inlawlawagna a dagiti met adda ti tarakenna a dadakkel a baboy a naapektaran ket makaawat ti 12 a ribu a pisos.
Innayonna nga ad-adda pay a napaigetan ti panagbantay dagiti barangay officials kadagiti rummuar ken sumrek a baboy iti lugarda.
