LAOAG CITY – Naragsak nga inpakaammo ni Col. Jose Marie Santos ti Philippine Navy a nakabase ditoy Ilocos Norte nga adda ti sumurok tallo a ribu ti bimmisita iti Military Park Cape Bojeador kageddan ti holiday season.
Inbatadna nga iti baet a makapaspasar ti panagarbis ken panagtudo ket saan daytoy a nagbalin a lapped kadagiti turista ken gangganaet tapno bumisita iti nasao a tourist destination.
Inlawlawagna a naruay ti bilang dagiti bimmisita iti Military Park Cape Bojeador kageddan ti holiday season.
Innayonna nga ita a tawen 2025 ket ad-adda pay a papintasenda ti nadamat a tourist attraction tapno ad-adu ti maallukoy nga agpasiar iti lugar.
Kabayatanna, mabalin pay a pangisayangkatan ti lugar dagiti camping activities dagiti estudiante.
