LAOAG CITY – Nagtitipon dagiti agarup 600 a corn stakeholders iti intero a Luzon iti Illocos Norte Centennial Arena.
Daytoy ket gapu iti pannakaisayangkat ti 18th Luzon Wide Corn Congress.
Segun ken ni Engr. Shiela Marie Opelac, mangidadaulo ti City Agriculture Office, ti nasao nga aktibidad ket addaan ti tema a “Masaganang Maisan para sa Bagong Pilipinas.”
Inbatadna a ditoy a napagsasaritaan dagiti wagas tapno ad-adda pay a mapapintas, mapabileg ken mapaadu ti produksion ti mais iti intero a Luzon babaen iti panagbibinnulig ti Department of Agriculture, National Corn Program, Local Government Units (LGU) ken ti Philippine Maize, Inc. (PhilMaize).
Mamati isuna a dakkel a tulong daytoy iti produksion ti mais ditoy Ilocos Norte kangrunaanna ditoy siudad ti Laoag gapu ta ti mais ti maysa kadagiti kangrunaan a produkto dagiti residente ditoy siudad.
Nagyaman ti Provincial Government ti Ilocos Norte babaen ken ni Governor Cecilia Araneta-Marcos ken iti City Government of Laoag babaen ken ni Mayor James Bryan Alcid gapu iti pannakaipangpangruna dagiti mannalon.
Kabayatanna, ti agrikultura ti maibilang a duri ti ekonomia ti probinsia ken iti siudad.
