LAOAG CITY – Agarup 75 a milyon a botante idiay Amerika ti nakipaset iti early voting sakbay pay ti eleksion inton bigat, Nobiembre 5, oras idiay Amerika.
Segun ken ni Philippine Ambassador to the United States Jose Manuel Romualdez, daytoy ti umuna a gundaway iti pakasaritaan ti Amerika a naruay dagiti nasapa a nagbutos.
Iti biang ti Filipino-American community, inbatad ni Amb. Romualdez nga aggudua ti panagpili da dati nga United States Pres. Donald Trump ken Vice Pres. Kamala Harris.
Kunana a nakasaritana dagiti sumagmamano a Fil-Ams kangrunaanna iti Cleveland, Ohio no sadinno a kaadduan kadakuada ket Democrats ngem adda latta ti sumupsuporta ken ni Trump.
Adu met dagiti Democrats iti dadduma pay nga estado ti Amerika iti northeast kas ti Virginia, New Jersey ken Massachusetts ngem adu dagiti supporters ti dati nga United States President.
Innayon ni Amb. Romualdez a maibilang a kritikal ken nabara ti eleksion ita idiay Amerika.
