LAOAG CITY – Mapattapatta a dumanon iti 150 a ribu a pisos ti balor iti pannakadadael ti maysa a pagtaengan kalpasan a nauram iti Brgy. Lydia iti ili ti Marcos iti panangsarabo ti baro a tawen.
Daytoy ti inpakaammo ni F/Supt. Roxanne Parado, Provincial Fire Marshal ti Bureau of Fire Protection ditoy probinsia.
Segun kenkuana, basar iti inisyal nga imbestigasionda ket rumrummuar a gapu iti electrical wirings ti posible a namunganayan ti napasamak nga uram.
Inbatadna a nangrugi ti uram iti maysa a kuarto ti pagtaengan a mapapati nga adda ti nakasaksak a wi-fi a mabalin a nagrugian ti uram.
Inlawlawagna nga alisto a nagramram ti apoy gapu iti kinaadu ti kagamitan nga adda iti uneg ti kuarto ti pagtaengan.
Kunana a nagpaot iti uneg ti 45 a minuto sakbay a naan-anay a nasebseban ti uram.
Innayonna a nagresponde pay ti dua a fire truck manipud iti ili ti Dingras ken Banna.
