LAOAG CITY – Agarup sumurok 4 a milyon a pisos ti balor dagiti taraken nga inpaay ti Provincial Government babaen iti Provincial Veterinary Office kadagiti mannalon ditoy probinsia a nakiddaw iti Agri Ka Dito program.
Indauluan a mismo ni Gov. Cecilia Araneta Marcos ti pannakaipaay dagiti nasao a taraken kadagiti 550 nga umili.
Naammoan a dagiti nakaipaayan ti 100 a kalding ket manipud iti ili ti Badoc, Currimao, Marcos, Paoay, Piddig, Pinili, San Nicolas ken Solsona idinto a naipaayan ti saggaysa a burias ken saggaysa a Hog starter dagiti 130 nga umili iti ili ti Pasuquin ken naipaay ti 3,200 a Free Range Chicken ken 80 a Broiler Feeds dagiti 320 nga umili manipud ditoy siudad ti Laoag.
Mainaig iti daytoy, mangnamnama ti probinsia a nakatulong daytoy kadagiti indibidual para ti nayon a pagsapulanda ken kasta met a tagibenenda dagitoy a maipapaay kadakuada.
