LAOAG CITY – Kinumpirmaran ni Police Lt. Col. Amador Quiocho, hepe ti PNP Laoag ti saan a panagkinnaawatan ti nagreklamo a da Robert Jay Chua ken ti asawa na a ni Rhea Marie Chua ken iti kameng ti PNP Laoag a ni Police Lt. Jennie Lingan.
Kuna na a daytoy ket mainaig iti panagturong dagiti agassawa a Chua iti maysa a clinic ditoy siudad ti Laoag a maipagarup nga awan ti passes da ken nasita da iti checkpoint iti Brgy. 51-A nangalisan ditoy siudad ti Laoag.
Segun kenni Quiocho, adda ti inpakita ni Chua nga appointment da iti maysa a doktor iti clinica iti checkpoint nga indauloan ni Lt. Lingan.
Inlawlawag na nga awan ti barangay pass slip da gapu ta idi immuna a nagpacheck-up da iti clinica ket napalubusan da a simrek ditoy siudad ti Laoag usar laeng ti appointment iti doktor, uray awanan da ti pass slip.
Kabayatanna, inbatad ni Quiocho, babaen ti pananginterview na kenni Lt. Lingan, naglikudan na ti alegasyon dagiti agassawa a Chua seknan ti maipagarup nga insawang na kadagiti maseknan nga “sorry for my words, uray matay ta misis mo sir”.
Kuna na a ti panangtapik pay ni Lingan ti paltog na ket mannarisim na.
Para kenni Quiocho, naikkan kuma ti konsiderasyon da Chua a makadalyasat iti checkpoint tapno awanen ti nagbalin a riri gapu ta adda met ti importante a papananda kas ti naipakita nga appointment order iti doktor.
Inbatad na a ti met laeng kitaen da ket dagiti nasken a maipakita kas iti pass slip, certification ti doktor nga agpaagas ti maysa a pasyente ken dadduma pay.
Kabayatanna, inpasingked ni Quiocho a sidadaan da a mangawat ti reklamo dagiti agassawa a Chua kontra kenni Lt. Lingan ken adda ti gundaway ti police officer a mangsungbat ti reklamo dagiti maseknan.
Innayon na a nairecord datoy nga insidente iti police blotter kasta met ti sungbat ni Lingan iti naiblotter a report.
