LAOAG CITY – Naduktalan nga iti babaen ti liderato ni Vice President Sara Duterte iti Department of Education (Deped) ket adda ti P9 billion a balor ti laptops ken e-learning equipment ti saan a naideliver idi 2023.
Daytoy ti inbutaktak ni Department of Education Director for Information and Communications Technology Service (ICTS) Director Ferdinand Pitagan iti panagdengngeg ti House Committee on Appropriations sa 2025 budget proposal ti Department of Education.
Kinumpirmaran ni Pitagan ti 2023 report ti Commission on Audit (COA) 2023 a nangibaga nga adda ti P2.18 billion manipod iti P11.36 billion budget ti Department of Education para iti computers, laptops, smart television sets ken e-learning equipment ti nausar.
Iti panagsaludsud ni Batangas Rep. Jinky Luistro no apay a 2 a bilyon a pisos laeng ti disbursement ti Department of Education idinto a 11 a bilyon a pisos ti budgetda, insungbat ni Pitagan a saan a nagastos ti dakkel a paset ti 2023 budget para iti Computerization Program gapu ta ti paylaeng 2022 budget ti gasgastusen ti ahensya.
Gapu iti naginad a panaggatang kadagiti laptop, kuna ni Pitagan a ti student to computer ratio ket 1 is to 9 ken ti teacher to computer ratio ket 1 is to 30.
Inpetteng met ni Luistro a gapu iti nakapuy a panangurnus ti Department of Education ti e-learning ket bagsak ti pagilian iti Programme for International Student Assessment (PISA).
