LAOAG CITY – Inpetteng ni Center for International Law President Atty. Joel Butuyan nga awan ti umdas a pangibasaran dagiti damag mainaig iti agdama nga health condition ni dati a Presidente Rodridgo Duterte rason tapno maitantan ti nasken koma a confirmation of charges inton Septiembre 23.
Inbatad ni Butuyan kadagiti nagbalin a naglabas a pannakainuman dagiti annak ti dati nga opisial kangrunaanna da Vice President Sara Duterte nga adda iti nasayaat a kasasaad ti dati a Presidente iti uneg ti detention center.
Inlawlawagna a dagitoy nga addang ket maysa laeng kadagiti baseless claims-da tapno maka-secure ti maysa nga interim release manipud iti International Criminal Court (ICC).
Kunana nga ammo ti dati a Presidente ti agdama a mapaspasamak ken ti inaramidna isut gapuna a mamati isuna a dagiti ibagbaga ti defense team ket agpapada a delaying tactics laeng kalpasan a na-deny dagiti naudi a mosionda.
Kabayatanna, inpakaammona a maysa daytoy a political move ti panangapela ni Nicolas Kaufman, legal counsel ni dati a Presidente Duterte ken ni Presidente Ferdinand Marcos Jr. a palubosan a makaawid ditoy pagilian ti dati nga opisial.
Innayonna nga agtultuloy nga us-usaren dagiti Duterte ti interes dagiti diehard Duterte Supporters (DDS) tapno maipangabak ti 2028 national elections.
