LAOAG CITY- Naibakwit dagiti agkabsat a persons with disabilities (PWD) idiay Barangay Rayuray iti ciudad ti Batac gapo iti iduduprak ti Bagyo Rosita ditoy probinsya.
Daytoy ti kinumpirmaran ni Mr. Arwin Lumang, mangidadaulo ti City Disasters Risk Reduction Management Office (CDRRMO) iti nasao a ciudad.
Segun kenni Lumang, manamnama nga ita a bigat ket itulod da dagiti maseknan nga agkabsat iti pagtaengan da.
Inbatad na a natalged ti nagyanan dagiti agkabsat ken adda ti kadwa da a nurse ken doktor a mangkita kadakuada.
Kabayatanna, kuna ni Lumang a nangiyuswat da pay ti clearing operation iti Barangay Camguidan ken Barangay Quiling Sur kalpasan a nagkiddaw dagiti residente nga adda ti kayo a mabalin a mangtupak iti pagtaengan da.
