LAOAG CITY – Inpakaammo ni Mr. Joel Bulalaque, Administration Head ti maysa nga hotel ditoy siudad ti Laoag a dagiti agkasangay ita nga aldaw ti Valentine’s Day ket makaala ti diskuento kabayatan iti panag-check in dagitoy iti hotel-da.
Daytoy ket kagiddan pay laeng iti pannakaselebrar ti aldaw dagiti puso ita nga aldaw, Pebrero 14.
Segun kenkuana, dagiti agkasangay ti Pebrero 13, 14 ken 15 ket maka-avail ti 50 a porsiento a diskuento kadakuada no sadinno a masapul a mangipakita dagitoy ti government ID a mangipaneknek nga agkasangayda kadagita nga aldaw.
Inbatadna nga adda ti ididiaya a para iti “short time” nga umabot iti 375 a pisos agingga iti 520 a pisos ken depende iti pilienda a room.
Inlawlawagna a kadagiti hotel ket adda ti family room, team room, superior ken de luxe hotel no sadinno nga iti family room ket makaakomodar ti uppat agingga iti lima nga indibidual nga umabot iti 2,640 para iti overnight nga adda ti para breakfast.
Kunana a mabalin nga agkiddaw dagiti guest kadakuada no ania ti kalikagum a set up dagitoy a maidiaya a free service.
Innayonna a mangnamnama daytoy a mapunno ken ad-adu dagiti guest-da ita a tawen maidasig kadagiti naglabas a tawen ken inpasingkedna pay nga agbalin a nakalalagip ti Valentine’s date dagitoy.
