LAOAG CITY – Inbatad ni Mr. Dominador Alberto, ti officer in charge iti Consumer Protection Division ti Department of Trade and Industry (DTI) a basar iti panagsursur da kadagiti aglaklako ti bagas ket sumursurot met dagitoy iti Executive Order 39 a magikedkeddeng ti presyo a 41 pesos iti rgular milled rice ken 45 pesos iti well-milled rice.
Kunana nga adda dagiti retailers a mangar-aramid ti pamuspusan kas iti pananggiling wenno aramiden da daytoy nga arina tapnu mailako da dagiti pondoda a bagas iti napinpintas a presio.
Immanugot met ni Alberto iti daytoy ngem inpaganetget na nasken a saan a nangatngato ngem ti naituding a presio ti bagas ti panagilako da.
Kabayatanna, kunana nga iti ciudad ti Batac, kaadwan a lako ket ti well-milled ken regular milled rice nga ilaklako da iti P41 aggingga P45.
Inlawlawag ni Alberto nga ti agdama a presio ti panagangkat dagiti retailers ket P48 agingga P50 iti kada kilo ti well-milled ken regular milled rice.
Mainaig iti daytoy, sinigurado met dagiti traders a nalaklaka ti sumarsaruno a presio ti bagas a maited kadagiti rice retailers tapnu maliklikan ti panakalugi da.
Iti agdama, inpasigurado ni Alberto nga itultuloy da ti panagbisita kadagiti dadduma pay a munisipalidad tapnu mamonitor ti pannakaipatungpal ti Executive Order 39.
Innayon na a bayat ti panagsursor da, imonmonitor da pay ti retailers’ profile tapno makitada no siasinno dagiti maikkan ti ayuda babaen iti Dept. of Social Welfare and Development.
