LAOAG CITY – Natukkol ti akin-kannawan a saka dagiti aglive-in partner na kalpasan ti napasamak a desgrasya iti national highway bisinidad iti Barangay 10, Estancia idiay ili ti Pasuquin.
Iti imbestigasyon ti PNP iti ili ti Pasuquin, kabayatan ti panag-papaamyanan a direksyon ti maysa a kotse nga inturong ni Eugenio Santos Jr y Reyes, 63, naasawaan, residente iti Brgy. 12 ditoy ciudad ti Laoag ket nag-left turn a saan a nagsignal.
Ginandat ti sumarsaruno a motorsiklo nga inturong ni Manny Steve Victoriano y Agustin, 33, lubbon na ti live-in partner na a ni Theresa Ancheta y Paras, 29, agpada dagitoy a residente iti Brgy. 18, Estancia iti ili ti Piddig a liklikan ti kotse ngem nadungpar na latta ti sango daytoy.
Naamoan a ti maysa pay a motorsiklo a sumarsaruno nga inturong ni Jhamille Marin y Canlas, 23, awanan ti asawa, lubbon na ni Noel Lumbo y Ravelo, 32, agpada dagitoy a residente iti Brgy. 24 iti ili ti Sarrat,ket nadungpar na met ti likud ti kotse a nagresulta ti pannakatulid da.
Gapu ti napigsa a pannakadungpar ti motorsiklo nga inturong ni Victoriano iti kotse ket agpada a natukkol ti akin-kannawan a saka dagiti nakalugan nga aglive-in partner.
Iti agdama, nagtalinaed iti ospital dagiti aglive-in partner idinto nga agtultuloy ti imbestigasyon dagiti otoridad iti napasamak nga insidente.
