LAOAG CITY – Sinungbatan ni Mr. Cipriano Perry Martinez ti Acting General Manager iti Ilocos Norte Electric Cooperative iti saludsod kenkuana no isuna kadin ti madutukan nga agbalin a General Manager ti kooperatiba ditoy probinsia kalpasan a nagngudon iti kontratana.
Segun kenkuana, adu ti mangal-allukoy kenkuana wenno mangibagbaga nga isuna ti maipatugaw kas General Manager ti kooperatiba kangrunaanna ken ni Gov. Mathew Marcos Manotoc.
Inbatadna nga adda ti proseso iti agbalin a General Manager ken no maipanggep iti kualipiksion ket awan ti problema.
Kunana nga iti agdama ket naragsak isunan kas Acting General Manager ti Ilocos Norte Electric Cooperative.
Inlawlawagna a ti napateg ket agtultuloy ti panagipaayna iti serbisio kadagiti umili kangrunaanna iti in-inut a panagbaba iti singir ti kuryente a dakkel a nakalag-anan ti rikna ken bulsa dagiti naruay a consumers ditoy probinsia.
Maipalagip a nangrugi ti panagtakem ni Martinez kas Acting General Manager iti Ilocos Norte Electric Cooperative idi Setiembre iti napalabas a tawen no sadino nagngudo daytoy idi Marso iti agdama a tawen.
Kabayatanna, inpanamnama ni Martinez iti agtultuloy a panagbaba iti singir ti kuryente tapno mabang-aran ti nadagsen nga ibakbaklay a paggastoan dagiti kakailian.
