LAOAG CITY – Maysa nga agtawen iti 94 a lalaki idiay Minnesota, USA ti nakagun-od ti world record iti panagbalinna kas kataengan a driver ti bus iti intero a lubong.
Kinumpirmaran ti records keeping organization a Guinness World Records a ni Jim Oppegard ti agdama nga akin-iggem ti world record iti titulo a “World’s Oldest Bus Driver” gapu iti tawenna a 94.
Nangrugi a nangiturong ti bus ni Oppegard idi daytoy ket agtawen iti 45. Nagretiro isuna iti tawenna nga 65 ngem saan a nagbayag ti retirement-na ken nagsubli daytoy kas bus driver gapu ta madukutan isuna iti pagtaenganda.
Gapu iti tawenna, kasapulanna nga ipasa ti tinawen a physical exam-na. Basar iti employer ni Oppegard a Northstar Bus Lines nga adda iti nasayaat pay laeng a kondision ti salun-at ni Oppegard iti baet ti kinataengna.
Iti agdama, agdi-drive ni Oppegard ti school bus ket ti maurnongna ket ikabilna iti Christian ministry nga inpasdek ti anakna idiay Africa.
