LAOAG CITY – Naiyawat ti 25 a ribo a pisos nga insentibo iti maysa a senior citizen ditoy ciudad ti Laoag nga agtawen ti 102.
Daytoy ti inbata ni Mrs. Erlinda Agustin, ti mangidadaulo iti Senior Citizens Affairs Office ditoy ciudad ti Laoag.
Binigbig na daytoy a ni Nana Teodora, agtawen ti 102 ken residente iti Brgy. 51- A, Nangalisan ditoy ciudad.
Inbatad ni Agustin a daytoy nga addang ket wagas iti panangipaay ti suporta kadagiti residente ditoy ciudad nga agserbi a tulong kadagiti makadanun iti nasao nga edad.
Innayon na a karaman kadagiti nakaimatang iti pannakaiyawat iti nasao a kantidad ket ni Barangay Chairman Alexander Barry Alcid ken Barangay Kagawad Emily Martillano.
Kabayatanna, inpakaammo ni Agustin a nagyaman ni Nana Teodora iti naipaay kenkuana a tulong gapu ta ibilang na daytoy a dakkel a makatulong iti sibubukel a pamilya na.
Immunan a nakaawat ni Nana Teodora ti 100 a ribo a pisos idi nadanun na ti tawen na a 100 kas paset ti ipapaay nga insentibo ti gobierno lokal para kadagiti centenarian.
