LAOAG CITY – Kinumpirmaran ni Brgy. Chairman Eugene Casil iti Brgy. Libtong iti ili ti Bacarra nga adda ti maysa a kabarangayan da nga agtawen ti 17 a nagpositibo iti Delta Variant.
Segun kenni Casil, idi Setyembre 6 ket timmawag kenkuana ti Municipal Health Office a nangipakammo daytoy a banag.
Immuna iti daytoy, idi napan nagpa-check-up ti babai iti Mariano Marcos Memorial Hospital and Medical Center iti ciudad ti Batac gapo ta masikog daytoy ket naduktalan a positibo iti covid-19 kalpasan a dimmalan iti RT-PCR test a mandatory requirement iti nasao nga ospital.
Inbatad na a saan na met a masinunuo no sadinno ti posible a nakaalaan ti maseknan ti virus gapu ta saan met a rumrummuar iti pagtaengan da nangruna ket masikog iti dayta a gundaway.
Inlawlawag na nga idi rimuar ti positibo a resulta ti RT-PCR test daytoy ket inpatulod da ti specimen na iti Philippine Genome Center.
Inpakaammo na nga iti laksid a nalpas ti 21-Day Quarantine ti maseknan ket saan a rimrimmuar gapu ta kaan-anak na laeng iti kallabes.
Mainaig iti daytoy, inpalgak ni Casil a dagus a maipadalan ti RT-PCR test ita nga aldaw dagiti pito a miembro iti pamilya ti maseknan.
Innayon ti Kapitan a gapu iti daytoy a napasamak ket naideklara ti Total Lockdown iti Brgy. Libtong kas maibasar iti naiyatnag nga Executive Order ni Mayor Fritzie Dela Cruz – Gapasin.
