LAOAG CITY – Inbatad dagiti otoridad idiay Germany a ti prime suspect iti pannakabagkong ti mayor ket ti agtawen ti 17 nga adoptive daughter na.
Ummuna iti daytoy, ni Iris Stalzer ket naalektaran a mayor iti Herdecke, western Germany, ket nadiskubre iti pagtaengan na nga addaan ti sugat gapo iti pannakabagkong na.
Segun kadagiti otoridad, inbaga mismo ni Stalzer, agtawen ti 57 kadakuada a ti inadaptar na nga anak ti nangaramid iti krimen.
Naamoan a ti suspek ken ti agtawen ti 15 nga anak pay ti mayor ket innala dagiti pulis kalpasan ti krimen ngem manamnama a maipaima iti youth services.
Mainaig iti daytoy, inbatad met ni prosecutor Bernd Haldorn a ti krimen ket mabalin a gapo iti pamilya.
Kuna pay dagiti imbestigador a ti agtawen ti 17 nga anak ti biktima met laeng ti nangipakammo kadagiti otoridad a nasugatan ti ina na ken adda ti napasamak a robbery.
Nupay kasta, adda ti ebidensya a saan a pudno ti naireport kadakuada kas iti dua a kutsilyo a nangitunda iti panagpokus da iti anak mismo ti mayor.
Iti agdama, ni Stalzer ket matamtaming iti ospital ken addaan iti nasayaat a kondisyon.
