LAOAG CITY – Bayat a kaaduan kadagiti agtutubo ket makumikum iti panangbukel ti masakbayanda, maysa nga agtawen ti 23 a lalaki idiay Russia ti nasapa a nagretiro ken agaw-awaten ti pension.
Ni Pavel Stepchenko, tubo idiay Donetsk ket simrek iti pagadalan ti Russian Ministry of Internal Affairs iti tawenna a 16.
Kalpasan ti lima a tawen a panagadal, insigida a nangrugi iti serbisio iti ahensia.
Nupay kasta, iti uneg laeng ti dua a tawen a panagtrabahona, isuna ket opisial a nagretiro iti tawenna a 23 rason tapno magun-od ti titulo kas “youngest pensioner” ti pagilian.
Nasapa a nagretiro ni Stepchenko gapu iti maysa nga espesyal a probision iti linteg ti Russia.
Basar iti daytoy a pagalagadan, tunggal adda ti martial law, ti tunggal bulan a serbisio ket mabilbilang kas tallo a bulan ti credited length of service.
Gapu iti daytoy, iti uneg laeng ti dua a tawen ti aktual a panagtrabaho, naalana ti katukad ti innem a tawen a serbisio nga umdas tapno agbalin a kualipikado para iti nasapa a panagretiro nga addaan ti buo a pension.
Idi Nobiembre 28, 2023, opisial isuna a naipaayan ti buo a pension, maiyallubog iti maipatpatungpal a linteg idiay Russia.
Ti naisangsangayan a record-na ket kinumpirmaran ti International Record Registration Agency nga INTERRECORD ken nairaman iti “Book of Records of Russia.”
Naammoan a para kadagiti dadduma, daytoy ket maysa a loophole iti sistema, inpanpannakkel met daytoy ti state-controlled media kas pammaneknek ti kabaelan ken panagbalin a flexible ti social protection system idiay Russia.
