LAOAG CITY – Nasentensyaan a mabalud ti maysa a tawen ken innem a bolan ti maysa a lalaki a taga Barangay 4 iti ili ti Bacarra ngem agdama nga agnanaed idiay Hawaii.
Iti report ni Bombo International Correspondent Manny Pascua iti Hawaii, binigbig na ti akusado a ni Alvin Asuncion, agtawen ti 26, agnanaed iti Kahului, Maui.
Immuna iti daytoy, nakasoan ni Asuncion ti sexual assault gapu iti panagmolestya na ti maysa a babai iti uneg ti condominium iti Maui idi disyembre 3, 2014.
Naamoan a kalpasan ti insidente ket pimmanaw a dagus ni Asuncion idiay Maui ken napan iti San Francisco kalpasan na ket nagawid ditoy Pilipinas.
Nupay kasta, gapu ta adda ti sangsangwen a kaso ni Asuncion idiay Hawaii ken maysa daytoy nga US Citizen ket napasubli ken ditoy a natiliw ken nabalud.
Malaksid iti kaso a sexual assault ket naamoan nga adda pay ti immuna a kaso ni Asuncion.
