LAOAG CITY – Nagballaag ni Senadora Imee Marcos a mabalin a mapasamak ti sabali manen a krisis iti agrikultura bunsod gapu iti agtultuloy a panagngato ti presyo ken pangta ti panagkurang iti suplay ti abono, maysa a sitwasyon a direkta a makaapektar iti produksyon ken presyo ti bagas iti pagilian.
Basar iti senador, no agtultuloy ti panagngato iti gastos iti abono, possible a bumagsak ti produksyon ti irik ken ad-adda a ngumato ti presyo ti bagas iti merkado.
Inpetteng ni Marcos nga adda dagiti grupo a maipagarop a possible a manggungundaway iti baet ti sitwasyon.
Kuna na a maipagarop nga inaramiden a negosyo dagiti oportunista a pamastrekan ti krisis.
Mainaig iti daytoy, ilungalong manen ni Senador Marcos ti panagusar ti biofertilizer kas alternatibo tapno maipababa ti gastos iti produksyon ken makatulong iti gagem a magun-od ti nalaklaka a bagas kadagiti distributor iti Kadiwa a maipagarop a nakailako ti bagas iti balor a ₱25 ti kada kilo nga awan ti subsidiya ken iti wagas nga usto laeng ti panagusar ti biofertilizer.
Nupay kasta, inpetteng ni Marcos nga adda dagiti rumrumuar a nanglapped iti nasao nga addang manipod iti uneg a mismo ti gobierno, karaman ti maipagarop a sumagmamano nga adda iti Department of Agriculture (DA) ken Kongreso, gapu iti interes dagiti dadakkel nga importer ti abono.
Kwinestyunaran pay ti senador ti agtultuloy a panangnamnama ti pagilian iti imported nga abono iti baet dagiti lokal nga alternatibo.
