LAOAG CITY – Inbatad ni Presidente Ferdinand Marcos Jr. nga adadalen a nalaing ti gobierno ti naisingasing a linteg a manglapped iti panagusar iti social media kadagiti menor de edad no sadinno dinakamatna dagiti mabalin nga epektona.
Kalikagumna a kitaen no mabalin a maadaptar ti pagilian ti pagalagadan dagiti dadduma a pagilian kas iti Australia ken Indonesia a mangipawpawil iti panagusar iti social media para kadagiti agtawen iti 16 agpababa.
Mainaig iti daytoy, immunan nga inaprubaran ti Senado ti Senate Bill No. 2424, wenno ti Safe Media Access and Responsible Technology for Kids in Digital Spaces wenno ti (SMART KIDS) Act, a mangipawil kadagiti agtawen 18 agpababa ti panagaramidda ti bukodda a socal media accounts.
Daytoy a lungalong a linteg nga inisponsoran ni Sen. Robinhood Padilla ket kalikagumanna dagiti digital service providers nga maimplementar dagiti age-assurance systems ken pawilan wenno ikkaten dagiti accounts nga us-usaren dagiti menor de edad kadagiti “high risk” digital platforms kas iti Meta, Roblox ken Gorebox gaputa maipagarup nga adda pakainaiganna dagitoy kadagiti kinaranggas iti maysa a pagadalan a nakatayan dagiti sumagmamano nga estudiante.
