LAOAG CITY – Kinumpirmaran ni Mayor Joefrey Saguid nga adda ti pimmusay nga agtawen ti lima nga ubing iti Barangay Suyo iti ili ti Dingras gapo iti maipagarop a dengue.
Segun kenni Saguid, naitaray ti ubing iti Dingras District Hospital ken nakitaan ti sintomas ti dengue ken nagtalinaed iti dua nga aldaw.
Inbatad na a gapo ta kimmaro ti sitwasyon ti ubing ket naiyakar ti ubing iti Mariano Marcos Memorial Hospital and Medical Center iti ciudad ti Batac ken nai-confine iti dua nga aldaw sakbay a pimmusay.
Inlawlawag na nga adda pay ti dumandanon kenkuana nga impormasyon a maipagarop nga adda ti sabali a sakit ti ubing ngem saan na pay a makupirmaran daytoy.
Maysa kadagiti kalikagom ti lokal a gobierno iti ili ti Dingras ket makumpirmaran ni pudno a dengue ti nakatayan ti ubing.
Mainaig iti daytoy, mangiyuswat da ti meeting kadwa na dagiti kakapitan iti nasao nga ili tapno mapakaamwan dagitoy a mangiyuswat ti fumigation tapno saanen a maulit ti nasao a pasamak.
