LAOAG CITY – Saan a rumbeng nga iyaleng-aleng ti agtultuloy a panagsaksakit wenno panagpipikel ti saka gapu ta mabalin a daytoy ket sintomas ti narisgo a kondisyon ti vascular a maaw-awagan ti limb ischemia.
Segun ken ni Philippine Heart Association Council on Coronary Artery Disease chair Paolo Joel Nocom, ti limb ischemia ket saan laeng a problema ti sirkulasyon dagiti gurong no di ket repleksyon ti pakabuklan ti cardiovascular health.
Nagballaag ti nasao nga espesyalista a ti nasao a sakit ket maikonektar iti sakit iti puso, stroke ken uray iti possible nga ipapatay no saan a maagasan.
Gapu iti daytoy, inbalakad ni Nocom a no makarikna kadagiti nadakamat a sintomas ket kasayaatan no mapan agpakonsultar a dagus iti doktor tapno maliklikan ti possible a pannakairisgo ti biag.
