LAOAG CITY – Inrakurak ni dati a Senador ken incoming Mamamayang Liberal wenno ML Party-list Representative Leila de Lima a maikanniwas iti 1987 Constitution ti desision ni Senate President Francis Escudero a naikeddeng inton Hunio 11 ti panangtalantan ti articles of impeachment kontra ken ni Vice President Sara Duterte.
Inlawlawagna a sumagmamanon a daras ti pannakaitantan ti Senado ti pannakatratar ti proseso para iti sangsangoen nga impeachment case ni Vice President Sara.
Inbatadna a maisupadi daytoy iti nalawag a nakailanad iti Konstitusion a nasken ket forthwith wenno insigida a rugianan ti panangisayangkat ti impeachment trial.
Innayonna a ti panangtingiting iti Bise Presidente ket saan nga opsyonal gapu ta basar iti Saligang batas ket obligado ti Senado nga agtignay kas impeachment court.
