LAOAG CITY – Inpakaammo ni Police Major Jephre Taccad, pannakangiwat iti Ilocos Norte Police Provincial Office nga agtultuloy ti panagbisita da kadagiti drug personality ditoy probinsya.
Kuna na nga umabot ti 43 nga indibidual ti na-Tokhang da itay napalabas a lawas iti nagduduma nga ili.
Segun kenni Taccad, agtultuloy pay ti panagmonitor da kadagiti natiltiliw iti kallabes a rimwar iti pagbaludan a simmango ti kaso a panaglabsing iti RA 9165 wenno Comprehensive Dangerous Drugs Act of 2002.
Inlawlawag na nga isuda ti kangrunaan a mamonitor gapu ta adda dagiti naiwayatan ti operasyon babaen kadagiti kameng ti Drug Enforcement Unit kas iti pannakatiliw ti maysa a lalaki a miembro iti drug group nga agop-operar ditoy probinsya.
