LAOAG CITY – Nasapgud ti Mitsubishi Montero ti maysa nga agtutubo kabayatan a magmagna iti igid ti kalsada iti paset ti Banna-Abra Road iti Barangay Catagtaguen iti ili ti Banna.
Nabigbig ti nangiturong ti puraw a Mitsubishi Montero a ni Crispin Duran y Domingo, agtawen ti 68, naasawaan, residente ti Sitio Murmuray iti Barangay Macayep iti ili ti Banna idinto ti biktima ket agtawen ti 13 ken residente ti Sitio Kalombuyan A iti Barangay Imelda iti nasao met laeng nga ili.
Basar iti Banna Municipal Police Station, kabayatan a magmagna ti biktima iti igid ti kalsada nga agturong nga agpa-laud ket kellaat lattan a nasapgud daytoy ti Mitsubishi Montero nga agturong met nga agpa-daya.
Gapu iti daytoy, nagsagaba ti sugat iti nagduduma a paset ti biktima nga insigida a naitaray iti Doña Josefa Memorial Hospital iti ili ti Marcos para iti naan-anay a pannakatamingna.
Kabayatanna, nagsinnarita a naimbag ti dua a partido maipanggep iti napasamak nga aksidente.
