LAOAG CITY – Nagkas-ang ti napasamak iti aguliteg kalpasan a nalmes da iti baybay iti ili a Currimao sakbay ti panangsarabu ti baro a tawen.
Nabigbig dagitoy a da Elyn Hope Pinalapal y Bartolome, agtawen ti 17 ken ti uliteg na a ni Dixon Pinalapal, agtawen ti 39, naasawaan ken agpada a residente ti Barangay Parangopong iti nasao nga ili.
Segun iti imbestigasyon, nagturong ti pamilya dagiti biktima iti Pangil Beach tapno agdidigos da ken bayat nga agdidigos dagitoy ket inalun-un ti napigsa a dalluyon ti ub-ubing a Pinalapal.
Dagus nga inasetgan ti uliteg na tapno isalakan na ngem nairamraman nga inalun-un ti dalluyon a poon ti pannakalmes da.
Naamuan a napigsa ti kuryente ti danum rason ti pannakalmes dagit biktima.
