LAOAG CITY – Linawlawagan ni Provincial Tourism Officer Aianree Raquel nga awan ti kinapudno na dagiti agwarwaras a damag a maitantan ti pannakaisayangkat ti Tan-ok ni Ilocano Festival of All Festivals manipud iti Pebrero dos ken maipan iti Pebrero diyes.
Imbatad na a nabayagen a naituding ti Pebrero dos a pannakaisayangkat na gapu iti kalikagum ti nasao nga aktibidad ti pangserra iti “bicentennial celebration” ken kangrunaan a pangrambak iti maika-201 nga anibersario ti Ilocos Norte.
Kunana a nupay narigat ti agsagana nangnangruna ket kalkalpas ti bakasyon, mamati a kabaelan dagiti nadumaduma a Local Government Units ti probinsia ti ag-practice ken agisagana kadagiti kasapulan da.
Segun kenkuana, agkakalaing dagiti choreographers, dagiti tourism officers ken dagiti dadduma pay nga adda pakainaiganna iti panagsagana para iti tan-ok a pakairamanan dagiti agsala.
Inbunannag na a malaksid iti ciudad ti Laoag a nagpakaammo a saan a makipartisipar ket addan ti pammasingked dagiti amin a 22 nga LGU’s ditoy probinsia a makipaset iti tan-ok.
Innayon na nga iti agdama ket addan iti kangitingitan ti panagsagana dagiti nadakamat nga LGU’s ditoy probinsia para iti nadakamat nga aktibidad.
