LAOAG CITY – Pinalagipan ti Department of Health ti publiko nga imonitor ti Air Quality Index lugar-da tapno maliklikan ti polluted nga angin.
Daytoy ket iti baet kadagiti report nga adda ti haze iti sumagmamano a paset ti Quezon City ken ti probinsia ti Rizal.
Pagan-annaden ti ahensia ti publiko nangruna kadagiti tattao a sensitibo iti polusion iti angin a kanayon nga isagana dagiti agasda basar iti abiso ti doktorda.
Karaman ditoy dagiti addaan ti asthma, emphysema, COPD wenno chronic obstructive pulmonary disease ken dagiti kapada a sakit.
Inabisoan pay ti ahensia ti publiko a no saan a maliklikan ti haze wenno polluted nga angin iti ruar, agsuot ti face mask kangrunaanna ti N95 mask.
Karaman iti pangibasaran iti Air Quality Index ti particulate matter 10 micrometers wenno PM 10 ken PM 2.5 a kolkolektaran ti Environmental Management Bureau ti Department of Environment and Natural Resources.
Ti PM 10 ket mangitunda daytoy ti iritasion iti upper respiratory tract kas ti sinus ken karabukob idinto ti PM 2.5 ket dumanon iti bara a mangitunda ti atake ti asthma ken problema iti cardiovascular system.
