LAOAG CITY – Naputed ti akin-kannawan a saka ti maysa a tricycle driver kalpasan ti napasamak a desgrasya iti Vintar road, bisinidad ti Barangay 23 ditoy ciudad ti Laoag.
Segun kenni Police Staff Sergeant Melmar Antonio, OIC ti PNP-Traffic Division ditoy ciudad ti Laoag, ti biktima ket ni Dionisio Agusti, dati a traffic aide ditoy ciudad.
Inbatad na nga iti inisyal nga imbestigasyon, agpalaud wenno agpakannigid nga agturong iti matartarimaan a kalsada iti bypass road ti biktima ngem immortake kenkuana ti motorsiklo nga inturong ti maysa a kameng ti PNP.
Gapo iti daytoy, nadungpar ti pulis ti tricycle a rason ti panagsagaba da ti sugat iti nagduduma a paset ti bagi da ken ti pannakatukkol ti saka ti biktima gapo iti pannakaipurak na.
Dagus met a naitaray iti ospital dagiti biktima para iti panakataming da.
Kabayatanna, agtultuloy pay laeng ti imbestigasyon dagiti otoridad seknan iti nasao a desgrasya.
