LAOAG CITY – Kalikagum ni Majority Leader Sandro Marcos nga al-alisto ken disiplinado ti taray ti legislative work iti House of Representatives kagiddan iti panagsubli iti session ti sumurok 300 a miembro ita nga aldaw ti Lunes, Enero 26.
Adda ti 36 pay a priority Legislative-Executive Development Advisory Council bills nga adda iti pipeline manipud iti 48 a gakat.
Karaman kadagiti prioridad dagiti reporma iti agrikultura, salun-at, edukasion ken social welfare.
Idadauluan ti Kamara dagiti amendments iti Rice Tariffication Law, Fisheries Code, Coconut Farmers Fund Act, Universal Health Care Act, Classroom-Building Acceleration Program, 4Ps Act, ken Masustansyang Pagkain Para sa Batang Pilipino Act.
Inbatad ni Marcos a gagem dagitoy nga addang a maipayalisto ti serbisio iti publiko, masigurado ti seguridad iti taraon, palawaen ti access iti health care ken edukasion ken protektaran dagiti marigrigat a pamilia.
