LAOAG CITY – Naglikudan ni Manila 3rd District Rep. Joel Chua ti alegasyon ni Davao City Rep. Paolo Duterte a nabutbuteng dagiti miyembro ti House Justice Committee tapno laeng suportaran da ti impeachment case kontra ken ni Vice President Sara Duterte.
Immunan nga inbatad ti dati a presidential son a maipagarop a tawtawagan dagiti chief of staff dagiti agpanpanday linteg tapno kiddawen kadakuada nga agbotos para iti impeachment.
Kuna ni Rep. Duterte a no saan nga agtungpal dagiti agpanpanday linteg ket mabalballaagan dagitoy a maikkat ti amin a pondo para iti idaulwan da a distrito.
Inpalgak ni Chua nga awan ti napasamak a blackmail iti panangtratar ti komite iti impeachment complaints kontra iti bise presidente.
Sinublianan ni Chua dagiti serye ti petition nga ipilpila ti kampo ti bise presidente iti korte tapno laeng saan a matuloy ti panagdengngeg, karaman ti panagpila met ti kaso kontra kadagiti miembro ti komite.
Segun ken ni Chua, awanen ti sabalin nga inaramid ti kampo dagiti Duterte no saan a ti mangdillaw iti panagdengngeg ken nagaramid ti akusasyon, idinto a saan a nakipaset dagitoy idi naikkan da ti gundaway nga agatendar iti hearing.
