LAOAG CITY – Nangipakita manen ti naiget a determinsion ni Filipina tennis star Alex Eala kalpasan nga inabakna ti dati a World No. 4 a ni Zheng Qinwen ti China ti iskor a 4-6, 6-4, ken 6-1,iti Round of 32 ti Mubadala CD Open.
Naala ni Zheng ti umuna a set kalpasan a makabales manipud iti nasapa a set ni Eala. Ngem saan a nagpaabak ti Filipina netter ken nakasubli iti maikadua a set iti babaen ti naudi a tallo nga ay-ayam tapno maitabla ti laban.
Iti deciding set, nagstand-out ni Eala kalpasaan ti 4-0 a lamang ken saanna nga inpaayan ti gundaway ti kalaban aginnga a mangabak daytoy.
Segun ken ni Eala, inabisuan daytoy ti coach na nga agtalinaed a kalmado ken natunos a agbalin a tulbek iti panagballigina.
Iti sumaruno a laban, makasango ni Eala ti Canadian tennis player a ni Leylah Fernandez, nga addaan met ti lahi a Filipino.
