LAOAG CITY – Kinumpirmaran a mismo ni dati a Bamban, Tarlac Mayor Alice Guo nga adda ti naawat na a pangta iti biagna ken nagkiddaw ti tulong ken ni Department of Interior and Local Government (DILG) Sec. Benhur Abalos Jr. Ken ni Philippine National Police (PNP) Chief PGen. Rommel Fracisco Marbil.
Inadmitir a mismo ni Guo daytoy iti panagsubli na ditoy Pilipinas manipod Jakarta Indonesia itay parbangon.
Segun ken ni Guo, nagkiddaw ti tulong kada Abalos ken Marbil gapu ta panagrikna na ket natalged daytoy iti Philippine National Police ken Department of the Interior and Local Government.
Kalpasan iti daytoy, inannugot ni Abalos a nagkiddaw ti sumagmamano a minuto ni Guo tapno makapagsarita da ken ni Philippine National Police Chief Marbil idi adda da paylaeng idiay Indonesia.
Saan metten nga indetalye ni Guo no ania a klase ti pangta a naawat na ngem inabisoan da ti dati a mayor a saan nga agbuteng ken ibutaktak na dagiti dadakkel a tattao nga adda iti likudan daytoy kagiddan ti panangikari da ti pannakaipaay ti naan-anay a seguridad ti dismissed mayor.
Kabayatanna, inlawlawag ni Department of the Interior Local Government Secretary Abalos ti pannaki-picture na kadwa na ni Philippine National Police Chief Marbil ken ni dati a Mayor Guo a kritkritikaren dagiti netizens.
Inkalintegan ni Abalos a ti ladawan ket para laeng iti documentation purposes kalpasan a kiniddaw ni Guo a makasarita na ida ken ni Marbil tapno ipakaammo nga adda ti naawat na a pangta iti biagna rason a nagdesisyon a pumanaw ditoy Pilipinas.
