LAOAG CITY – Nasakit ti nakem ni Mr. Carlos Pascua, ama ti ubing a maipagarup a dinangran ti maysa a mangisursuro iti Shamrock Elementary School ditoy ciudad ti Laoag.
Basar iti inpatulod a surat ni Pascua iti opisina ni Mrs. Vilma Eda, Schools Division Superintendent ditoy ciudad ti Laoag, binully dagiti kaklase na ti anak na no sadinno a pinagsawsaw-an da daytoy ken kinugtaran da rason a nagriri dagiti ubbing.
Inbatad na a binuybuya ti mangisursuro a ni Ms. Antonio dagiti ubbing bayat nga agriri da.
Kalpasan ti sumagmamano a minutos, maipagarop a pinungot ni Antonio ti anak na ken kinugtaran na daytoy iti sangoanan dagiti adalan na.
Mainaig iti daytoy, iti panagsarita ni Pascua ken ti nadakamat a mangisursuro iti guidance office ket inbatad ni Antonio a gapu iti pungtot na iti saan na a pannaakaanawa kadagiti ubbing ket pinagtangad na ti ubing ngem saan na a pinungot.
Pinaneknekan met dagiti sumagmamano a mangisursuro ken agad-adal iti nasao a pagadalan a saan a pinungot ni Antonio ti ubing nu diket pinagtangad na laeng daytoy.
Nagkedked met ni Principal Fermin Antonio a mangkasarita iti mairekreklamo a mangisursuro gapu ta naamoan nga anak na daytoy.
Inbatad ni Dr. Rowel Quilala, ti Legal Officer iti DepEd Division of Laoag a ti DepEd Regional Office ti mangtratar iti nasao nga isyu gapu ta mangisursuro ti maseknan iti daytoy.
