LAOAG CITY – Natay ti maysa nga ama kalpasan a nagbekkel iti mismo a pagtaenganna iti paset ti Brgy. 33-A, La Paz ditoy ciudad ti Laoag.
Nabigbig ti biktima a ni Ernesto Ramones Calinguin, agtawen ti 55 ken residente iti nadakamat a barangay.
Segun iti anak ti biktima a ni Erwin Francisco Calinguin, agtawen ti 36, agnanaed iti nadakamat met laeng a barangay, apaman a mapan bisitaen ti kabsatna ken ti kayongna iti pagtaengan ti amada ket dita a nakitada a nakatali iti tengnged ti amada.
Inbatadna a nagbatay ti amana ti maysa a timba nga intulidna ken iti ingalot na a tali a nangitunda ti pannakakettel ti biag ti amana.
Inpalgakna a maymaysa ti amana nga agnanaed ti pagtaengan a nakatayanna gapu ta saanna kayat ti naringgor nga aglawlaw.
Nupay kasta, mapan bisbisitaen dagiti annakna iti kada lawas.
Inpakaammona nga adda pay laeng nakakita iti amana nga agtugtugaw iti aruangan ti pagtaenganda idi bigat di kalman.
Inlawlawagna nga awan met ti ammo na a rason no apay naaramid daytoy ti amada ngem adda dagiti angaw ti amana kadagiti kaarrubada nga arigna ket agpakpakada daytoy.
Inbunannagna nga agsagsagaba ti sakit a hypertension ti amana ken 30 a tawenen a nagsina dagiti nagannakna.
Mainaig iti daytoy, mapatta-patta nga umabot ti tallo nga aldawen a pimmusay ti biktima.
Kabayatanna, awan met ti makita dagiti imbestigador ti PNP – Laoag a foul play iti napasamak nga insidente.
