LAOAG CITY – Inlungalong ni ACT-CIS Rep. Erwin Tulfo ken sumagmamano pay a kaduana iti Kongreso ti maysa a gakat a mangibilin iti Department of Health nga ikkan dagiti ramit ken agas dagiti amin nga ospital ti gobierno iti intero a pagilian kangrunaanna kadagiti nasusulinek a lugar.
Daytoy a gakat ni Cong. Tulfo kaduana da ACT-CIS Representatives Edvic Yap, Jocelyn Tulfo, Benguet Cong. Eric Yap ken Quezon City Rep. Ralph Tulfo ket napauloan ti “Universal Medical Access and Equipment Act of 2025.”
Segun ken ni Tulfo, makauma a dengdenggen manipud kadagiti umili nangruna kadagiti adda iti probinsia nga awan ti ramit ken agas iti ospital iti lugarda.
Inlawlawagna a kaaduan kadagiti ospital kadagiti probinsia ket malaksid nga awan ti agasda ket awan pay ti basic a ramit kas ti x-ray, ECG machine ken ultrasound.
