LAOAG CITY – Inlawlawag ni Ms. Cathy Estavillo, Secretary ti Bantay Bigas a nangato unay ti P50 iti kada kilo ti price cap iti ang-angkaten a bagas ti pagilian.
Reaksion daytoy ni Estavillo kagiddan iti naikeddeng a panangiparuk-at ni Presidente Ferdinand Marcos Jr. ti maysa nga Executive Order tapno ipatungpal ti price cap a P50 iti kada kilo para iti imported a well-milled rice.
Segun kenkuana, sakbay pay ti gubat idiay Middle East, nababa ti presio ti imported a bagas a sumsumrek ditoy pagilian a pammaneknek daytoy nga ad-adda a pabpaboran ti gobierno dagiti importers, traders ken millers.
Inbatadna nga awan ti nagdumaan iti pannakaipatungpal ti monopoly iti bagas ken langis ditoy pagilian.
Inpettengna a ti rumbeng nga aramiden ti gobierno ket iti panangipatungpal ti price control iti presio ti bagas iti babaen ti nalaka a panangilako kadagiti naruay a Pilipino.
Gapu iti daytoy, inpanawagan ni Estavillo ken ni Presidente Marcos nga ikkaten ti maysa kadagiti nailanad a section iti Republic Act No. 11203 a pawilan ti National Food Authority a mang-regulate ti presio ti bagas iti baet ti mapaspasaran a krisis.
Kunana a babaen iti daytoy ket posible a ti 20 a pisos iti kada kilo ti bagas a programa ti gobierno ket maipatungpal kadagiti merkado publiko iti intero a pagilian.
Innayonna a nakarkaro ti agdama a situasion a krisis ti pagilian maidasig idi COVID-19 pandemic gapu ta idi pandemia ket naiget laeng a rummuar dagiti tattao ngem ita ket ngimmina dagiti produkto a petrolyo ken dagiti kangrunaan a magatgatang a produkto.
